Sunday, May 25, 2008

وبدا العد التنازلي .. 12 يوم واتحرر من قيود الجامعة

السلام عليكم والرحمة
وبدا العد التنازلي .. 12 يوم واتحرر من قيود الجامعة
الحمد لله لم ذهبت خمس سنوات من عمري في الجامعة
وبقي 12 يوم لانتهي منها !! الحين وانا اكتب سؤال يتبادر الى ذهني
هل فعلا سيمر 12 يوم لاحس بالحرية بدون الجامعة
ان ان ساعتي ستتوقف قبل مرور 12 يوم
سؤال يمر على بالي << لو انا خيروني شو اختار
امممممممممممم
انا ادعو الله ان يكتب لي ما فيه خير لي .. الحين ولا باجر ولا عقب امية سنة
اللي فيه الخير لي في الدار الاخرة يكتبه لي
اما في نظري القاصر .. فاتمنى من الله ان يطيل عمري لبعد هذي الـ 12 يوم
ليش ؟
لاني احسني واااااااااااااااايد مقصر ، واتريا هذي الايام تمر عشان اعدل من نفسي
أمممممممممممممممممممم
أبي أرد ( ابو عبد الله ) محمد وافي القــديم << بل وأفضل مما كنت عليه في السابق
اسأل الله ان يطيل اعماركم ويحسن اعمالكم
يوم دخلت كان في بالي اشياء اكتبها اشوفني الحين اكتب اشياء ابدا ما كانت في بالي
على كلٍ
اتمنى من كل من مر من هنا ان لا يخبل علي بدعوة صالحة
كـ دعاء جميــل يجمع خير الدنيا والاخرة .. وقد ورد في الاثر عن النبي عليه الصلاة والسلام
اللهم اصلح لي ديني الذي هو عصمة أمري ، واصلح لي دنياي التي فيها معاشي ، واصلح لي آخرتي التي اليها معادي
واجعل الحياة زيادة لي في كل خير .. والموت راحة لي من كل شر
يزاكم الله خيرا

Monday, May 12, 2008

Me with Dr. Web Application

السلام عليكم ورحمة الله وبركاته
على قولة اخوانا المصريين وحشتني المدونة أوي أوي
وانتوا بعد وحشتوني
اليوم موضوعي معاكم سالفة صارت معاي منذ عدة أيام
وتحديدا يوم الاربعاء الماضي

ليلة الاربعاء كنت جالس مع صديقي وزميلي عبدالله الجناحي
شغالين على بروجكت، غرزنا في البروجكت فاتصلت على الدكتور حرمين
السلام عليكم
عليكم السلام
شحالك دكتور ، شخبارك ؟ شعلومك ؟
الحمد لله بخير
دكتور البرنامج فيه مشكلة ... الخ
الدكتور: حاول يفهمني بس انا انسان عملي زيادة عن اللزوم ما فهمت شي
فطلبت انا نلاقيه ، فاتفقنا ان نتلاقى في كلية تقنية المعلومات
لمن لا يعرف كلية تقنية المعلومات هي الكلية الوحيدة الموجودة حاليا في المبنى الجديد للجامعة
يعني هم الوحيدين حاليا اللي ماخذين العز، اما نحن ففي مبنى يمكن يطيح فوق روسنا في أي وقت ممكن
موعدنا الساعة 10قمت الساعة 9 وعشر دقائق تقريبا، اتصلت على عبدالله علساس نسير
فقال لي شوي أكون عندك، انا قلت برقد دقيقة واقوم
فما قمت الا والساعة 10 الا عشر تقريبا ، وعبدالله قريب
تسبحت على السريع وحركناوصلنا متاخرين ربع ساعة
اتصلت على الدكتور.. قال انتظروني تحت
لان في يوم الاربعاء زيارة الدكاترة مفتوحة فقط للطالبات ولنا الاثنين والثلاثاء
انتظرنا تحت ، انتظرنا انتظرنا ، مرت نصف ساعة
وهممنا بأمر سوء
وهو انا نروح ونتري
قوبين سحب وجذب << نفس المعنى
وبعد نصف ساعة تقريبا اتصلت على الدكتور مرة ثانية فقال شوي بتاخر .. دقايق
قلت حق عبدالله ، قم قم بارك الله فيك خلنا نتريق على السريع

(( بستطرد قليلا من قبل اسبوعين تقريبا جينا نقابل نفس الدكتور في نفس المكان فعزمنا في المطعم ميمونتو مطعم ايطالي موجود
وكان شي محرج انه الدكتور يعزمنا
حاولت انا وعبدالله ندفع لكن ما سمح لنا))
دخلنا المطعم
فقلت حق عبدالله ، اقول ترى انا ما عندي فلوس انت بتعزمني
ظرب على صدره .. وقال افا.. بس يمكن يطب علينا الدكتور ومب حلوة لانه المرة اللي طافت عزمنا
قلت له يستاهل اصلا، شو هذا ذلنا ونحن نتريا
رحنا صوب راعية المطعم
طلبنا المنيو ساعة ونحن نتشاور حتى وقع اختيارنا ان نطلب باستاطلبنا باستا وطلبيه على كيف كيفك
جان تقول 38 sir
عبدالله طلع بطاقة البنك جان تقول ما يستوي ما عندنا الجهاز طالع فيني وطالعت فيه طلعت كل ما عندي
وطلع كل ما عنده
ما ينفع .. شنسوي
كنسلنا الطلب وجلسنا داخل المطعم
جلسنا نتشاور قلت له اقول.. خلنا نشرف كوفي ولا شي قال حلو والله .. بس كم ؟
طالعنا المنيو .. الكوب على 15 ويــــه .. ما ينفع
قال لي عندي فكرة .. ننتظر الدكتور يوصل نقول له دكتور تعال والله معزوم ونسحبه
ونطلب عقب نطلع البطاقة .. بتقول ما نستخدم البطاقة وهو بيتلبس في السالفة
قلت له يا ذكي واذا قالت الفلبينية تراني قلت لكم انه ما عندي الجهاز
وضحـــــــــــــــــــــــــــــك
قلت له ما لنا الا الشاي بـ 4 دراهم
حلو .. نقدر نحن الاثنين نشرب
طلعت له نص درهم مع الـ 4 دراهم كان في زاوية مخباي ، عطيته الـ 4 ونص وقلت له بسرعة اطلب لنا
توه قام والدكتور دخل << كان عبدالله ظهره للمدخل ومب شايف الدكتور قلت له الدكتور وصل..
جان ييلس مرة ثانية ويرد الفلوس << فضيحة
يا الدكتور سلم علينا .. قالنا شباب شو اطلب لكم
في هذا الوقت من الفرحة كنت انا بطيرطالعت عبدالله .. حصلته يطالعني
كنت اتمنى لو قال هيه
لكن شفته ساكت وترك لي المجال
فقلت له .. يزاك الله خير دكتور .. ما تقصر .. بس ما نبي
انا في خاطري اقول .. يا رب يكون عنيد ويحلف علينا
قال لا لا .. لازم اخذ لكم شي ناظرت ربيعي .. وفي خاطري اقول له هيه .. لا لا مب حلوة
فقلت لا دكتور والله ما تقصر .. مرة ثانية ان شا الله
قلت في خاطري يا شين الفقر .. المفروض انا نحن نعزمه ..
بس من وين وانا وربيعي كاش ما شي
قال صايمين قلت له لاااااااااااااااااااااااااااااااا<< بعد عندي امل وخفت يروح
قال خلاص عيل اجيب لكم
اطالع في اللي معاي ساكت وما يتكلم لا رفض ولا ايجاب يعني وهقني
قلت له لا دكتور والله ما تقصر نحن شبعانين << جذاب والله كنت ميت من الجوع بس بروحها طلعت الكلمة
جان ييلس الدكتور << طول المحادثة ونحن واقفين
في خاطري قلت لاااااااااااااااااا ، راحت علينا
قلت له دكتور تبي تاكل خذ راحتك
قال لا ما اكل روحي
جيت ابي اقول خلص نحن بناكل معاك
بس سكت ما عرفت شو اقول
جلست وانطميت
شكله كان مرة ضاربه الجوع
اخذ لاب توب عبدالله .. وكتب باسوورده هناك
انا زين ما مت من الضحك شوي الدكتور قام وراح يطل
بقمت انغز عبدالله
ادعي ادعي انه يجيب لنا شي معاه .. بس مستحيل وجلست اقول ياااااااارب يجيب لنا معاه شي
شوي رجع الدكتور وجلس الطلبية بعد عدة دقائق وصلت .. وكانت عبارة عن طبقين بيتزاياااااا سلااااااااااام ..
شو استانست بلعتهم بلع
يوم نحن ناكل، يلسنا نسولف
سألت الدكتور عن ليبيا وعن دراسته وجي
بصراحة وايد وايد استانسنا مع الدكتور
انشهد انه وايد طيوب وسوالف << والله تقول ربيعنا ويدرس معانا
المهم عقب شرح لنا .. ويلس يبحث معانا عن حلول وجي
والحمد لله .. فهمنا ورجعنا فرحين مسرورين